Mohammed Amin al-Husseini

Dr Mohammed Amin al-Husseini (arabisch محمد أمين الحسيني‎, DMG Muḥammad Amīn al-Ḥusainī oder al-Hussaini, änglisch al-Husayni; * 1895, 1896 oder 1897 z Jerusalem; † 4. Juli 1974 z Beirut) isch en islamische arabische Nazionalist us ere iiflussriiche Jerusalemer Familie gsi. Er isch vo Groossbritannie as Mufti vo Jerusalem iigsetzt worde het sich 1921 zum Füerer vo de Palestinenser ufgschwunge, won en äigene Nayionaalstaat aagsträbt häi. Er het e Kombinazioon vo Islamismus, Antizionismus und verschwörigstheoretischem Antisemitismus verdrätte und het die Ideologie noochhaltig unter de Araber verbräitet.

Vo 1936 bis 1939 het er dr Arabisch Ufstand gege jüüdischi Iiwanderer und gege d Brite, wo Palestina as Mandat vom Völkerbund verwaltet häi, aagfüert. Vo 1937 het er mit em NS-Reschiie zsämmegschafft, won er aber scho sit 1933 understützt het. Vom Oktober 1941 bis zum Ändi vom Zwäite Wältchrieg het er z Dütschland gläbt und die nazionalsozialistischi Bropaganda im arabische Ruum verbräitet. Er het dr Holocaust understützt und aktiv mitghulfe, d Fluchtwääg für Juude us Osteuropa z blockiere und so duusigi vo jüüdische Chinder em NS-Reschiim usgliiferet. As Mitgliid vo dr SS het er Muslim für d Waffen-SS uf em Balkan mobilisiert.

Noch em Chrieg isch dr al-Husseini as Chriegsverbrächer festgnoo worde, aber mä het en nid aaklagt. 1946 het em Egüpte Asyl gee, und vo dört us het er sini Ziil witerverfolgt. Noch em Palestinachrieg vo 1948 und dr Masseflucht vo Palestinenser (Nakba) het er si politischi Füerigsstellig verloore. Er isch e Verwandte, Leerer und Förderer vom Jassir Arafat gsi, wo spööter Füerer vo dr PLO worde isch. Für die isch dr al-Husseini immer non e Held.